ပုရွက်ဆိတ်ခိုးယူတင်ပို့မှုကြောင့် ဒဏ်ငွေကြီးနှင့် ထောင်ဒဏ်ချမှတ်ခံရသော တရုတ်အမျိုးသား

ကင်ညာနိုင်ငံတွင် ပုရွက်ဆိတ်များကို တရားမဝင် သယ်ဆောင်ထုတ်ပို့ရန် ကြိုးပမ်းမှုများ ဆက်တိုက် ဖြစ်ပွားနေပြီး ထိုအမှုများအပေါ် တရားရုံးက ပြင်းထန်သော အရေးယူမှုများ ချမှတ်လာနေကြောင်း သိရပါတယ်။
ဧပြီလ ဗုဒ္ဓဟူးနေ့တွင် ကင်ညာတရားရုံးတစ်ခုက တရုတ်နိုင်ငံသား Zhang Kequn ကို အသက်ရှင်လျက်ရှိသော ပုရွက်ဆိတ်များကို နိုင်ငံပြင်ပသို့ လျှို့ဝှက်သယ်ထုတ်ရန် ကြိုးပမ်းမှုကြောင့် ကင်ညာရှီလင် ၁ သန်း (အမေရိကန်ဒေါ်လာ ၇,၇၄၆ ခန့်) ဒဏ်ငွေနှင့် ၁၂ လ ထောင်ဒဏ် ချမှတ်ခဲ့ပါတယ်။
အမှုကို စီရင်ခဲ့သည့် တရားသူကြီးက ကင်ညာနိုင်ငံအတွင်း ပုရွက်ဆိတ်များကို ခိုးယူရောင်းဝယ်မှုများ မကြာခဏ ဖြစ်ပွားနေသည့်အတွက် ထိုကဲ့သို့သော လုပ်ရပ်များကို တားဆီးနိုင်ရန် အပြစ်ဒဏ်ကို ပြင်းထန်စွာ ချမှတ်ရခြင်းဖြစ်ကြောင်း ပြောကြားခဲ့ပါတယ်။
Zhang Kequn ကို ယခင်လက နိုင်ရိုဘီမြို့ရှိ အပြည်ပြည်ဆိုင်ရာလေဆိပ်တွင် ၎င်း၏ ခရီးဆောင်အိတ်အတွင်း အသက်ရှင်လျက်ရှိသော ဥယျာဉ်ပုရွက်ဆိတ်ပေါင်း ၂,၂၀၀ ကျော်နှင့်အတူ ဖမ်းဆီးရမိခဲ့ပါတယ်။ ၎င်းသည် အစပိုင်းတွင် တောရိုင်းတိရစ္ဆာန်မျိုးစိတ်များကို တရားမဝင် ရောင်းဝယ်မှုအပါအဝင် စွဲချက်များကို မကန့်ကွက်ခဲ့သော်လည်း နောက်ပိုင်းတွင် အပြစ်ကို ဝန်ခံခဲ့ပြီး ၎င်း၏ရှေ့နေက အဆိုပါ အပြစ်ဒဏ်အပေါ် အယူခံဝင်မည်ဖြစ်ကြောင်း ပြောကြားထားပါတယ်။
ထိုကဲ့သို့ ပုရွက်ဆိတ်များကို ခိုးယူရောင်းဝယ်ခြင်းသည် တရုတ်နိုင်ငံကဲ့သို့သော စျေးကွက်များတွင် ဝါသနာရှင်များက “formicarium” ဟုခေါ်သော ဖန်ဘူးများအတွင်း ပုရွက်ဆိတ်များကို ထိန်းသိမ်း၍ ၎င်းတို့၏ လူမှုဖွဲ့စည်းပုံနှင့် အပြုအမူများကို လေ့လာရန် ငွေကြေးများစွာ ပေးချေကြသည့် လိုအပ်ချက်ကြောင့် ဖြစ်ပေါ်လာခြင်းဖြစ်ပါတယ်။
ထို့ပြင် ယမန်နှစ်တွင်လည်း ပုရွက်ဆိတ်ထောင်ချီကို တရားမဝင် သယ်ဆောင်ရောင်းဝယ်ရန် ကြိုးပမ်းခဲ့သည့် လူလေးဦးအား တစ်ဦးလျှင် ကင်ညာရှီလင် ၁ သန်းစီ ဒဏ်ငွေ ချမှတ်ခဲ့ကြောင်း သိရပါတယ်။
တောရိုင်းတိရစ္ဆာန်ကျွမ်းကျင်သူများက ယခင်က ဆင်ခေါင်းရိုးကဲ့သို့သော တန်ဖိုးမြင့် သယံဇာတများကို ဦးတည်ခဲ့သော ဇီဝခိုးယူမှုများသည် ယခုအခါ လူသိနည်းသည့် မျိုးစိတ်များသို့ ပြောင်းလဲလာနေကြောင်းကို ထိုအမှုများက ပြသနေကြောင်း သုံးသပ်ပြောကြားခဲ့ကြပါတယ်။