ဗီယက်နမ်ခရီးသည် လေယာဉ်ပေါ် မီးဖွား၊ မိခင်အခြေအနေကြောင့် ရန်ကုန်သို့ အရေးပေါ်ဆင်းသက်

စက်တင်ဘာ ၅ ရက်က ဒိန်းမတ်နိုင်ငံ ကိုပင်ဟေဂင်မြို့မှ ဟိုချီမင်းမြို့သို့ ပျံသန်းလာသည့် Vietnam Airlines လေယာဉ် VN38 ပေါ်တွင် ဗီယက်နမ်အမျိုးသမီးခရီးသည်တစ်ဦး လေယာဉ်ပျံသန်းပြီး ၁၀ နာရီခန့်အကြာတွင် ရုတ်တရက် မီးဖွားခဲ့သည်။

လေယာဉ်အမှုထမ်းများက အရေးပေါ်ကျန်းမာရေးလုပ်ထုံးလုပ်နည်းများအတိုင်း ဆောင်ရွက်ကာ ဆေးဘက်ဆိုင်ရာအတွေ့အကြုံရှိသူများကို အကူအညီတောင်းခံခဲ့သည်။ ထို့နောက် ခရီးသည် ၅ ဦးက စေတနာဖြင့် ဝိုင်းဝန်းကူညီပေးခဲ့ရာ ကလေးငယ်ကို လေယာဉ်ပေါ်တွင် ဘေးကင်းစွာ မွေးဖွားနိုင်ခဲ့သည်။

သို့သော် မီးဖွားပြီးနောက် မိခင်၏ကျန်းမာရေးအခြေအနေ မတည်ငြိမ်သဖြင့် လေယာဉ်ကို မြန်မာနိုင်ငံရှိ ရန်ကုန်အပြည်ပြည်ဆိုင်ရာလေဆိပ်သို့ အရေးပေါ်လမ်းကြောင်းပြောင်း ဆင်းသက်ခဲ့သည်။ မြေပြင်ဝန်ဆောင်မှုအဖွဲ့နှင့် လေဆိပ်အာဏာပိုင်များ ပူးပေါင်းကာ မိခင်နှင့် ကလေးကို ဆေးရုံသို့ ပို့ဆောင်ပေးခဲ့သည်။

ကျန်းမာရေးအကူအညီများ ပြီးစီးပြီးနောက် VN38 သည် စက်တင်ဘာ ၆ ရက် နံနက် ၃:၃၀ နာရီတွင် ရန်ကုန်မှ ပြန်လည်ထွက်ခွာခဲ့ပြီး နံနက် ၆:၀၅ နာရီတွင် ဟိုချီမင်းမြို့ရှိ Tan Son Nhat အပြည်ပြည်ဆိုင်ရာလေဆိပ်သို့ ဘေးကင်းစွာ ရောက်ရှိခဲ့သည်။

Vietnam Airlines က ယင်းအရေးပေါ်လမ်းကြောင်းပြောင်းမှုသည် ခရီးသည်၏ ကျန်းမာရေးနှင့် ဘေးကင်းရေးကို ဦးစားပေး၍ ဆောင်ရွက်ခဲ့ခြင်းဖြစ်ကြောင်း ပြောကြားခဲ့ပြီး ကိုယ်ဝန်ဆောင်များအပါအဝင် ကျန်းမာရေးအခြေအနေအထူးရှိသူများအနေဖြင့် လေယာဉ်မစီးမီ မိမိတို့၏ကျန်းမာရေးအခြေအနေကို စစ်ဆေးအကဲဖြတ်ပြီး လိုအပ်ပါက ဆရာဝန်နှင့် တိုင်ပင်ရန် အကြံပြုထားသည်။

#လေယာဉ် #မီးဖွား #ဗီယက်နမ် #လေဆိပ်