ဂျာမနီတွင် မိန်းကလေးကို မဖွယ်မရာပြုသည့် စက်ရုပ်ကို ရဲသိမ်းဆည်း
ဂျာမနီနိုင်ငံ၊ ကိုလုံးမြို့တွင် အသက် ၁၆ နှစ်အရွယ် မိန်းကလေးတစ်ဦးကို စက်ရုပ်ဖြင့် မဖွယ်မရာပြုလုပ်ခဲ့သည်ဟု စွပ်စွဲခံရသည့် အသက် ၁၆ နှစ်အရွယ် စက်ရုပ်ပိုင်ရှင်နှင့် အသက် ၁၉ နှစ်အရွယ် အမျိုးသားတစ်ဦးကို ရဲတပ်ဖွဲ့က စုံစမ်းစစ်ဆေးလျက်ရှိကြောင်း သိရသည်။
ဖြစ်စဉ်မှာ ပြီးခဲ့သည့် စနေနေ့ ညသန်းခေါင်မတိုင်မီအချိန်တွင် မြို့လယ်ခေါင်အနီးရှိ အမြန်အစားအစာဆိုင်တစ်ဆိုင်ရှေ့၌ သူငယ်ချင်းများနှင့်အတူ ရှိနေသည့် မိန်းကလေးထံသို့ အမြင့် ၁၂၀ စင်တီမီတာခန့်ရှိ အနီရောင်နှင့် ရွှေရောင်စက်ရုပ်တစ်ရုပ်က နောက်မှချဉ်းကပ်လာခဲ့ခြင်းဖြစ်သည်။
ရဲတပ်ဖွဲ့၏ ထုတ်ပြန်ချက်အရ အဆိုပါစက်ရုပ်သည် မိန်းကလေး၏ တင်ပါးကို ကိုင်တွယ်ခဲ့ပြီး လိင်ပိုင်းဆိုင်ရာ မဖွယ်မရာလှုပ်ရှားမှုများ ပြုလုပ်ခဲ့သည်ဟု စွပ်စွဲခံထားရသည်။ မိန်းကလေးက အော်ဟစ်ကာ ရှောင်ဖယ်သွားခဲ့ပြီးနောက် အရေးပေါ်ဝန်ဆောင်မှုအဖွဲ့များထံ အကြောင်းကြားခဲ့ကြောင်း သိရသည်။
ရဲတပ်ဖွဲ့ဝင်များသည် အခင်းဖြစ်ပွားရာနေရာမှ တစ်ဘလောက်ခန့်အကွာတွင် ဆယ်ကျော်သက်စက်ရုပ်ပိုင်ရှင်နှင့် ၎င်း၏အဖော်ကို တွေ့ရှိခဲ့ပြီး ကားနောက်ခန်းအတွင်း ထည့်ထားသည့် စက်ရုပ်ကိုလည်း သိမ်းဆည်းခဲ့သည်။
စုံစမ်းစစ်ဆေးခံနေရသူနှစ်ဦးသည် ဖြစ်စဉ်ကို လူမှုကွန်ရက်ပေါ်တွင် တိုက်ရိုက်ထုတ်လွှင့်ခဲ့ပြီး မှတ်ချက်များလည်း ပြောဆိုခဲ့သည်ဟု ယူဆရကြောင်း North Rhine-Westphalia ပြည်နယ်ရဲတပ်ဖွဲ့က ထုတ်ပြန်ထားသည်။
ရဲတပ်ဖွဲ့က ထုတ်ပြန်ခဲ့သည့် ဓာတ်ပုံတွင် စက်ရုပ်သည် အနက်ရောင်နှုတ်ခမ်းမွေးအတု၊ ရွှေရောင်ဆွဲကြိုးနှင့် အဖြူရောင်အင်္ကျီတို့ကို ဝတ်ဆင်ထားသည်ကို တွေ့ရသည်။
လက်ရှိတွင် အဆိုပါဖြစ်စဉ်နှင့်ပတ်သက်၍ ရဲတပ်ဖွဲ့က ဆက်လက်စုံစမ်းစစ်ဆေးလျက်ရှိကြောင်း သိရသည်။