ရန်ကုန်တွင် အင်အား ၃.၅ အဆင့်ရှိ ငလျင်လှုပ်ခတ်၊ ပြည်သူအချို့ အဆောက်အအုံများမှ ပြေးဆင်း
ရန်ကုန်၊ ဇူလိုင် ၄
ရန်ကုန်မြို့တွင် ယနေ့ ဇူလိုင် ၄ ရက် နံနက် ၆ နာရီ ၅၁ မိနစ်ခန့်က အင်အား ၃ ဒသမ ၅ (ရစ်ခ်တာစကေး) ရှိ မြေငလျင်တစ်ခု လှုပ်ခတ်ခဲ့ပြီး အထပ်မြင့်တိုက်ခန်းများ၊ ရုံးအဆောက်အအုံများနှင့် ကွန်ဒိုများတွင် နေထိုင်သူအချို့မှာ လုံခြုံရေးအတွက် အဆောက်အအုံများမှ အလျင်အမြန် ဆင်းပြေးခဲ့ကြကြောင်း သိရသည်။
မိုးလေဝသနှင့် ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ အဆိုပါငလျင်သည် ရန်ကုန်တိုင်း၊ ထန်းတပင်မြို့၏ တောင်-အရှေ့တောင်ဘက် ၃ မိုင်ခန့်အကွာကို ဗဟိုပြု၍ အနက် ၁၅ ကီလိုမီတာတွင် နံနက် ၆ နာရီ ၅၁ မိနစ် ၈ စက္ကန့်၌ လှုပ်ခတ်ခဲ့ခြင်းဖြစ်ပြီး ရန်ကုန်မြို့အပါအဝင် နေရာအချို့တွင် လှုပ်ခတ်မှုကို သိသာစွာ ခံစားခဲ့ရကြောင်း သိရသည်။
ငလျင်လှုပ်ခတ်ချိန်တွင် အဆောက်အအုံများ လှုပ်ယမ်းမှုကို သိသိသာသာ ခံစားရသဖြင့် ပြည်သူများက ဓာတ်လှေကားအသုံးမပြုဘဲ လှေကားများမှတစ်ဆင့် အောက်ထပ်သို့ အလျင်အမြန် ဆင်းခဲ့ကြကြောင်း သိရသည်။
စမ်းချောင်းမြို့နယ်မှ ဒေသခံတစ်ဦးက "မနက် ၆ နာရီ ၅၀ လောက်မှာ အဆောက်အအုံတစ်ခုလုံး လှုပ်သွားတာ သိသာတယ်။ အားလုံးက ငလျင်လှုပ်တယ်ဆိုပြီး ချက်ချင်းအောက်ကို ဆင်းပြေးကြတယ်" ဟု ပြောသည်။
See less