ရော်နယ်ဒို ကမ္ဘာ့ဖလားပြိုင်ပွဲမှ အနားယူကြောင်း အတည်ပြု

ပေါ်တူဂီအသင်းခေါင်းဆောင် ခရစ္စတီယာနို ရော်နယ်ဒို က ၂၀၂၆ ကမ္ဘာ့ဖလား ရှုံးထွက် (၁၆) သင်းအဆင့်တွင် စပိန်အသင်းကို ၁-၀ ဂိုးဖြင့် ရှုံးနိမ့်ကာ ပြိုင်ပွဲမှ ထွက်ခွာခဲ့ပြီးနောက်၊ ယခုကမ္ဘာ့ဖလားသည် ၎င်း၏ နောက်ဆုံး ကမ္ဘာ့ဖလားပြိုင်ပွဲဖြစ်ကြောင်း အတည်ပြုပြောကြားခဲ့သည်။

ရော်နယ်ဒိုက SportTV နှင့် တွေ့ဆုံရာတွင် “ဒီလိုပုံစံနဲ့ ကမ္ဘာ့ဖလားကနေ ထွက်ခွာရတာ ဝမ်းနည်းပါတယ်။ ဒါပေမယ့် ကျွန်တော် အကောင်းဆုံး ကြိုးစားခဲ့ပြီး ဖြစ်သမျှအတွက် စိတ်ရှင်းရှင်းနဲ့ ထွက်ခွာနိုင်ပါတယ်” ဟု ပြောကြားခဲ့သည်။

ထို့ပြင် “ဘောလုံးသမားတစ်ယောက်ရဲ့ ဘဝက အနိုင်ရတဲ့နေ့ရှိသလို ရှုံးနိမ့်တဲ့နေ့လည်း ရှိပါတယ်။ အရေးကြီးတာက ဆက်လက်ရှေ့ဆက်ဖို့ပါပဲ။ ဒီကမ္ဘာ့ဖလားဟာ ကျွန်တော့်ရဲ့ နောက်ဆုံးကမ္ဘာ့ဖလား ဖြစ်ပါတယ်။ အခုတော့ မိသားစုနဲ့ အချိန်ကုန်ဆုံးပြီး စိတ်အေးအေးထားကာ အနာဂတ်အတွက် ဆုံးဖြတ်ချက်တွေ ချမှတ်သွားမှာပါ” ဟု ဆိုသည်။

အသက် ၄၁ နှစ်အရွယ် ရော်နယ်ဒိုက “မနက်ဖြန်မှာလည်း စိတ်ရှင်းရှင်းနဲ့ နိုးထလာနိုင်ပါလိမ့်မယ်။ ကျွန်တော်ဟာ ပေါ်တူဂီအသင်းအတွက် ဥရောပချန်ပီယံဆု (၁) ကြိမ်နဲ့ UEFA Nations League ဖလား (၂) ကြိမ် စုစုပေါင်း နိုင်ငံအသင်းအောင်မြင်မှု (၃) ကြိမ် ရယူပေးနိုင်ခဲ့ပါတယ်။ ကျွန်တော်မတိုင်ခင် ပေါ်တူဂီဟာ ဒီလိုချန်ပီယံဆုတွေ မရခဲ့ဖူးပါဘူး။ ဒါကြောင့် ကိုယ့်တာဝန်ကို အပြည့်အဝ ထမ်းဆောင်ခဲ့တယ်လို့ ယုံကြည်ပါတယ်။ ဘဝကတော့ ဆက်လက်ရှေ့ဆက်သွားမှာပါ” ဟုလည်း ပြောကြားခဲ့သည်။

ရော်နယ်ဒိုသည် ၂၀၀၆ ခုနှစ် ဂျာမနီကမ္ဘာ့ဖလားတွင် ပထမဆုံးအကြိမ် ဝင်ရောက်ယှဉ်ပြိုင်ခဲ့ပြီး အီရန်အသင်းကို ဂိုးသွင်းယူကာ ပေါ်တူဂီကို နှစ် ၄၀ အတွင်း ပထမဆုံးအကြိမ် ဆီမီးဖိုင်နယ်အဆင့်သို့ ပို့ဆောင်ပေးခဲ့သည်။ ထို့နောက် ၂၀၁၀ တောင်အာဖရိက၊ ၂၀၁၄ ဘရာဇီး၊ ၂၀၁၈ ရုရှား၊ ၂၀၂၂ ကာတာနှင့် ၂၀၂၆ ကမ္ဘာ့ဖလားတို့တွင်လည်း ပါဝင်ယှဉ်ပြိုင်ခဲ့ပြီး ကမ္ဘာ့ဖလား (၆) ကြိမ်ဆက် ဝင်ရောက်ကစားခဲ့သည့် ဘောလုံးသမိုင်း၏ အထင်ကရ ကစားသမားတစ်ဦးအဖြစ် မှတ်တမ်းတင်နိုင်ခဲ့သည်။

#ရော်နယ်ဒို #နှုတ်ဆက် #ကမ္ဘာ့ဖလား #FIFAWorldCup2026 #သုတမြေ

See less