ဟော်မုဇ်ရေလက်ကြား ပြန်လည်ဖွင့်လှစ်ရေး အီရန်ဘက်မှ အဆိုပြုချက်ထုတ်ပြန်

လက်ရှိဖြစ်ပွားနေသော အမေရိကန်-အီရန် ပဋိပက္ခတွင် အရေးပါသော အလှည့်အပြောင်းတစ်ခုအဖြစ် အီရန်နိုင်ငံအနေဖြင့် ဟော်မုဇ်ရေလက်ကြားအား ပြန်လည်ဖွင့်လှစ်ပေးရန် အသင့်ရှိကြောင်း၊ သို့သော် အမေရိကန်ဘက်မှ ချမှတ်ထားသော ပိတ်ဆို့မှုများကို ရုပ်သိမ်းပေးရန်နှင့် စစ်ပွဲအား အဆုံးသတ်ရန် လိုအပ်ကြောင်း ယနေ့ (ဧပြီလ ၂၇ ရက်) တွင် ဒေသတွင်းသတင်းရင်းမြစ်များက ဖော်ပြသည်။
အမေရိကန်သမ္မတ ဒေါ်နယ်ထရမ့်သည် ပြီးခဲ့သည့်ရက်ပိုင်းက နှစ်နိုင်ငံကြားရှိ အပစ်အခတ်ရပ်စဲရေးကို ရက်အကန့်အသတ်မရှိ သက်တမ်းတိုးမြှင့်ကြောင်း ကြေညာခဲ့သော်လည်း ငြိမ်းချမ်းရေးအတွက် ခိုင်မာသောသဘောတူညီချက်တစ်ခု ရရှိရန်မှာမူ စိန်ခေါ်မှုများစွာ ကျန်ရှိနေသေးသည်။ အီရန်နိုင်ငံ၏ အဆိုပြုချက်တွင် ၎င်းတို့၏ နျူကလီးယားအစီအစဉ်နှင့် ပတ်သက်သည့် ဆွေးနွေးမှုများကို နောက်တစ်ဆင့်သို့ ရွှေ့ဆိုင်းထားရန် တောင်းဆိုထားပြီး အဆိုပါအချက်အပေါ် အမေရိကန်ဘက်မှ လက်ခံနိုင်ခြေ နည်းပါးကြောင်း သုံးသပ်သူများက ဖော်ပြသည်။
ပါကစ္စတန်နိုင်ငံ၏ ကြားဝင်စေ့စပ်မှုဖြင့် ဆောင်ရွက်လျက်ရှိသော အဆိုပါညှိနှိုင်းမှုများတွင် အီရန်ဘက်က ဟော်မုဇ်ရေလက်ကြားအား နိုင်ငံတကာ သင်္ဘောသွားလာရေးအတွက် ဖွင့်လှစ်ပေးမည့် အခြေအနေကို ဖော်ပြထားသည်။ သို့သော်လည်း အမေရိကန်ဘက်ကမူ ၎င်းတို့၏ ရေကြောင်းပိတ်ဆို့မှုများကို အပြည့်အဝ ဆက်လက်ထားရှိမည်ဖြစ်ပြီး အီရန်၏ နျူကလီးယားဆိုင်ရာကိစ္စရပ်များနှင့် ဒေသတွင်း တင်းမာမှုလျှော့ချရေးအတွက် ခြွင်းချက်မရှိ သဘောတူညီချက်ရရှိမှသာ ပိတ်ဆို့မှုများကို ရုပ်သိမ်းမည်ဟု ခိုင်မာစွာ ရပ်တည်လျက်ရှိသည်။
လက်ရှိတွင် ဝါရှင်တန်နှင့် တီဟီရန်တို့သည် သံတမန်ရေးအရ အပြန်အလှန် အဆိုပြုချက်များ ပေးပို့နေကြဆဲဖြစ်သည်။ အမေရိကန်သမ္မတ ထရမ့်က အီရန်ဘက်မှ တင်ပြလာသော အဆိုပြုချက်အသစ်ကို သုံးသပ်ရန်အတွက် ၎င်း၏ ထိပ်တန်းလုံခြုံရေးအကြံပေးများနှင့် ယနေ့တွင် အရေးပေါ်ဆွေးနွေးမှုများ ပြုလုပ်ရန် စီစဉ်ထားသည်။ ဒေသတွင်း လုံခြုံရေးနှင့် ကမ္ဘာ့ရေနံဈေးကွက်အတွက် အလွန်အရေးပါသော ဟော်မုဇ်ရေလက်ကြားအရေးသည် နှစ်နိုင်ငံကြား တင်းမာမှုများ၏ ဗဟိုချက်မဖြစ်နေဆဲဖြစ်ပြီး၊ နှစ်ဖက်စလုံး၏ ဆုံးဖြတ်ချက်များအပေါ် ကမ္ဘာ့အသိုင်းအဝိုင်းက စောင့်ကြည့်လျက်ရှိသည်။
သမ္မတ ဒေါ်နယ်ထရမ့်က တနင်္ဂနွေနေ့တွင် ပြောကြားရာ၌ အီရန်နိုင်ငံအနေဖြင့် နှစ်လကြာဖြစ်ပွားနေသည့် စစ်ပွဲအား အဆုံးသတ်ရန် ဆွေးနွေးလိုပါက ၎င်းထံသို့ ဖုန်းဆက်သွယ်နိုင်ကြောင်း ထည့်သွင်းပြောဆိုခဲ့သည်။
Reuters
#နိုင်ငံတကာ #ဟော်မုဇ်ရေလက်ကြား #အီရန် #သတင်းထူးသတင်းဦး #သုတမြေ