မြန်မာနိုင်ငံအနှံ့ တိုင်းနှင့်ပြည်နယ် (၇) ခုတွင် လေပြင်းတိုက်ခတ်မှုများ ဆက်တိုက်ဖြစ်ပွားကာ နေအိမ်များနှင့် လမ်းမများပေါ်သို့ သစ်ပင်များ လဲကျပျက်စီးမှုများရှိနေ

မြန်မာနိုင်ငံတစ်ဝန်းရှိ တိုင်းဒေသကြီးနှင့် ပြည်နယ်အများအပြားတွင် ယခုရက်ပိုင်းအတွင်း မိုးသက်လေပြင်းများ ကျရောက်လျက်ရှိရာ နေပြည်တော်၊ မကွေး၊ ပဲခူး၊ မန္တလေး၊ စစ်ကိုင်း၊ ရှမ်းနှင့် ကချင်ပြည်နယ်စသည့် ဒေသကြီး (၇) ခုတွင် လေပြင်းတိုက်ခတ်မှုကြောင့် နေအိမ်များ၊ ဆိုင်ခန်းများနှင့် အဓိက လမ်းမကြီးများပေါ်သို့ သစ်ပင်များ လဲကျမှုများ အစုလိုက်အပြုံလိုက် ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်၏ ထုတ်ပြန်ချက်အရ သိရသည်။

လေပြင်းတိုက်ခတ်မှုကြောင့် ပျက်စီးဆုံးရှုံးမှုများနှင့် လမ်းပိတ်ဆို့မှုများကို ဧပြီလ ၂၆ ရက်နှင့် ၂၇ ရက်နေ့များတွင် ဆက်တိုက်ဆိုသလို ရင်ဆိုင်ခဲ့ရသည်။ ဧပြီလ ၂၇ ရက်နေ့ နံနက် ၆ နာရီခန့်တွင် ရှမ်းပြည်နယ်၊ လဲချားမြို့၊ အမှတ် (၄) ရပ်ကွက်၊ ဗထူးလမ်း၌လည်းကောင်း၊ မန္တလေးတိုင်းဒေသကြီး၊ ပြင်ဦးလွင်မြို့နယ်၊ ရပ်ကွက်ကြီး (၆)၊ မြို့ပတ်လမ်းတွင်လည်းကောင်း သစ်ပင်ကြီးများလဲကျပြီး လမ်းပိတ်ဆို့မှုများ ဖြစ်ပွားခဲ့သည်။

အလားတူ ဧပြီလ ၂၆ ရက်နေ့ကလည်း မကွေးတိုင်းဒေသကြီး၊ စေတုတ္တရာမြို့နယ်၊ အမှတ် (၂) ရပ်ကွက်တွင် သစ်ပင်လဲကျမှု ဖြစ်ပွားခဲ့သည်။ ပဲခူးတိုင်းဒေသကြီး၊ တောင်ငူမြို့နယ်တွင် မိုးသည်းထန်စွာရွာသွန်းပြီး လေပြင်းတိုက်ခတ်မှုကြောင့် အမှတ် (၁) ရပ်ကွက်၊ သိမ်တော်ဦးဘုရားလမ်းရှိ ပြည်သူ့နေအိမ်တစ်လုံးပေါ်သို့ သစ်ပင်လဲကျကာ ပျက်စီးမှုများရှိခဲ့သည်။ နေပြည်တော်၊ တပ်ကုန်းမြို့နယ်တွင်လည်း ရန်ကုန်-မန္တလေး ကားလမ်းဟောင်း၊ မိုင်တိုင်အမှတ် (၂၅၉/၃) အနီးရှိ ကုန်စုံဆိုင်တစ်ဆိုင်ပေါ်သို့ သစ်ပင်လဲကျခဲ့သည်။

ထို့အပြင် မန္တလေးတိုင်းဒေသကြီးအတွင်းရှိ ပျော်ဘွယ်မြို့နယ် မြင်းဘက်ရပ်ကွက်၊ ရန်ကုန်-မန္တလေး ကားလမ်းဟောင်းဘေးနှင့် ပြင်ဦးလွင်မြို့နယ်၊ သုံးတောင်ကျေးရွာ၊ မိုင်တိုင် (၂၇/၇) အဆင်းလမ်းတို့တွင်လည်း သစ်ပင်များလဲကျကာ လမ်းပိတ်ဆို့မှုများ ဖြစ်ပေါ်ခဲ့သည်။ ကချင်ပြည်နယ်၊ မိုးညှင်းမြို့နယ်၊ ဟိုပင်မြို့၌လည်း ပြည်ထောင်စုလမ်းမကြီး (ရွှေဘို-မြစ်ကြီးနားလမ်း) ပေါ်သို့ လေပြင်းကြောင့် သစ်ပင်လဲကျခဲ့သဖြင့် ယာဉ်အန္တရာယ် ဖြစ်ပေါ်ခဲ့သည်။

အဆိုပါ ဖြစ်စဉ်များအားလုံးတွင် သက်ဆိုင်ရာ မြို့နယ်မီးသတ်စခန်းများမှ တပ်ဖွဲ့ဝင်များသည် ဒေသခံပြည်သူများ၊ အုပ်ချုပ်ရေးအဖွဲ့အစည်းများနှင့် ပူးပေါင်းကာ သစ်ပင်ကြီးများကို ဖြတ်တောက်ရှင်းလင်းခြင်း၊ လမ်းပွင့်အောင် ဆောင်ရွက်ခြင်းနှင့် နေအိမ်ဆိုင်ခန်းများအား ပြန်လည်ပြုပြင်ရန် ကူညီခြင်းတို့ကို အချိန်နှင့်တစ်ပြေးညီ ဆောင်ရွက်ခဲ့ကြောင်း သိရသည်။ ယခုရက်ပိုင်းအတွင်း မြန်မာနိုင်ငံအနှံ့အပြားတွင် မိုးကြိုကာလ မိုးသက်လေပြင်းများ တိုက်ခတ်နိုင်ခြေရှိနေသဖြင့် ပြည်သူများအနေဖြင့် လေပြင်းအန္တရာယ်ကို အထူးသတိပြုကြရန် မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးချက် ထုတ်ပြန်ထားသည်။