နီပေါရေကြီးမှုဖြစ်ပြီး ၁၀ ရက်အကြာ တရုတ်အမျိုးသားနှင့် နီပေါအမျိုးသမီးတို့ကို အသက်ရှင်လျက် ကယ်ဆယ်နိုင်

နီပေါနိုင်ငံတွင် အကြီးအကျယ်ရေကြီးရေလျှံမှုများ ဖြစ်ပွားပြီး ၁၀ ရက်အကြာတွင် တရုတ်နိုင်ငံသားအမျိုးသားတစ်ဦးနှင့် နီပေါနိုင်ငံသားအမျိုးသမီးတစ်ဦးကို ကယ်ဆယ်ရေးအဖွဲ့များက သီးခြားစီ အသက်ရှင်လျက် ကယ်ဆယ်နိုင်ခဲ့ကြောင်း သိရသည်။ တစ်ချိန်တည်းတွင် ပျောက်ဆုံးနေသူ ထောင်နှင့်ချီကိုလည်း ဆက်လက်ရှာဖွေနေကြသည်။

နီပေါစစ်တပ်၏ ထုတ်ပြန်ချက်အရ နီပေါစစ်တပ်မှ တပ်ဖွဲ့ဝင်များနှင့် တောင်ကိုရီးယားနိုင်ငံမှ သဘာဝဘေးအန္တရာယ် ကယ်ဆယ်ရေးကျွမ်းကျင်သူများ ပါဝင်သည့် ပူးပေါင်းအဖွဲ့သည် Upper Trishuli-1 ရေအားလျှပ်စစ်စီမံကိန်းရှိ အရှည် ၂၂၅ မီတာ (၇၄၀ ပေခန့်) ရှိသည့် မြေအောက်ဥမင်အတွင်းမှ တရုတ်နိုင်ငံသားအမျိုးသားကို ကယ်ဆယ်ခဲ့ခြင်းဖြစ်သည်။ ကယ်ဆယ်ပြီးနောက် ၎င်း၏ ကျန်းမာရေးအခြေအနေကို စစ်ဆေးပေးနေပြီး ဥမင်အတွင်းမှ ထုတ်ယူပြီးနောက် ရဟတ်ယာဉ်ဖြင့် ဆေးရုံသို့ ပို့ဆောင်ခဲ့ကြောင်း သိရသည်။

လက်ရှိတွင် နီပေါနိုင်ငံတစ်ဝန်းရှိ ရေအားလျှပ်စစ်စီမံကိန်း ၁၂ ခုခန့်ကို ကယ်ဆယ်ရေးလုပ်ငန်းများ အဓိကထားဆောင်ရွက်နေပြီး အလုပ်သမား ၉၀၀ ခန့် ပျောက်ဆုံးနေသည်ဟု သိရသည်။ ယင်းတို့အနက် အလုပ်သမား ၅၀၀ ခန့်သည် အရွယ်အစားကြီးမားသည့် မြေအောက်ဥမင်များအတွင်း ပိတ်မိနေဖွယ်ရှိကြောင်း ခန့်မှန်းထားသည်။

အိန္ဒိယ၊ တရုတ်၊ တောင်ကိုရီးယားနှင့် အမေရိကန်နိုင်ငံတို့မှ နိုင်ငံတကာကယ်ဆယ်ရေးအဖွဲ့များသည် အဆိုပါရေအားလျှပ်စစ်စီမံကိန်းများရှိ အပျက်အစီးများနှင့် ပျက်စီးသွားသည့် အဆောက်အအုံများအတွင်း ရှင်သန်ကျန်ရစ်သူများ ရှာဖွေရန် ပူးပေါင်းဆောင်ရွက်နေကြသည်။ ပြီးခဲ့သည့် သောကြာနေ့ကလည်း Trishuli မြစ်အတွင်းရှိ ရေအားလျှပ်စစ်စက်ရုံတစ်ခုမှ မြေအောက်ဥမင်အတွင်း ပိတ်မိနေသည့် နီပေါနိုင်ငံသား အလုပ်သမား ၂ ဦးကို အသက်ရှင်လျက် ကယ်ဆယ်နိုင်ခဲ့သည်။

သို့သော် မြေအောက်ဥမင်များအတွင်း ပျောက်ဆုံးနေသူများကို အသက်ရှင်လျက် ပြန်လည်တွေ့ရှိနိုင်မည့် အလားအလာမှာ အချိန်ကြာလာသည်နှင့်အမျှ လျော့နည်းလာနေကြောင်း ကျွမ်းကျင်သူများက သုံးသပ်ထားသည်။

ထို့အပြင် အသက် ၆၄ နှစ်အရွယ် နီပေါအမျိုးသမီးတစ်ဦးကိုလည်း ရေကြီးမှုကြောင့် အကြီးအကျယ်ပျက်စီးခဲ့သည့် Nuwakot မြို့ရှိ နေအိမ်တစ်လုံးအတွင်းမှ ကယ်ဆယ်နိုင်ခဲ့သည်။ နီပေါစစ်တပ်က ထုတ်ပြန်သည့် ဓာတ်ပုံများတွင် အမျိုးသမီးကို ရွှံ့နွံများအတွင်း နစ်မြုပ်နေသည့်အခြေအနေမှ ကယ်ဆယ်ရေးအဖွဲ့များက တွေ့ရှိခဲ့ပြီး ဘေးကင်းရာသို့ ဆွဲထုတ်ကာ ဆေးကုသမှုခံယူရန် ရဟတ်ယာဉ်ဖြင့် ကတ္တမန္ဒူမြို့သို့ ပို့ဆောင်ခဲ့သည်ကို တွေ့ရသည်။

အမျိုးသမီးကို နေအိမ်အတွင်းမှ ကယ်ထုတ်နိုင်ချိန်တွင် နီပေါရဲတပ်ဖွဲ့ဝင်များက ဝမ်းမြောက်စွာ အားပေးခဲ့ကြပြီး အဆိုပါနေအိမ်၏ အောက်ပိုင်းတစ်ခြမ်းမှာ ရွှံ့နွံထူထပ်စွာ ဖုံးလွှမ်းနေခဲ့ကြောင်း သိရသည်။

နီပေါနိုင်ငံတွင် ဩဂုတ် ၂၆ ရက်က ရေခဲမြစ်နှင့် ကျောက်တုံးများ ပြိုကျမှုကြောင့် အကြီးအကျယ်ရေကြီးရေလျှံမှုများ ဖြစ်ပွားခဲ့ခြင်းဖြစ်ပြီး ကယ်ဆယ်ရေးလုပ်ငန်းများမှာလည်း ရေကြီးမှုကြောင့် အခြေခံအဆောက်အအုံများ အကြီးအကျယ်ပျက်စီးခဲ့ခြင်းကြောင့် အခက်အခဲများနှင့် ရင်ဆိုင်နေရသည်။ တံတား ၄၀ ကျော် ပြိုကျခဲ့သည့်အပြင် မြစ်ရေများလည်း ခန့်မှန်းရခက်စွာ မြင့်တက်နေသဖြင့် ကယ်ဆယ်ရေးလုပ်ငန်းများ ပိုမိုခက်ခဲနေကြောင်း သိရသည်။

နီပေါနိုင်ငံ သဘာဝဘေးအန္တရာယ်စီမံခန့်ခွဲရေးအေဂျင်စီ၏ ထုတ်ပြန်ချက်အရ အဆိုပါရေကြီးမှုများကြောင့် လက်ရှိအချိန်အထိ လူ ၁,၃၇၅ ဦးထက်မနည်း သေဆုံးခဲ့ပြီး လူ ၅,၀၀၀ ကျော် ပျောက်ဆုံးနေဆဲဖြစ်ကြောင်း သိရသည်။

#သုတမြေ #ရေကြီး #ကယ်ဆယ်ရေး