ဆိုင်ကလုန်းမုန်တိုင်း “မူရားစု” အားကောင်းလာပြီး မြန်မာနိုင်ငံဒေသအများအပြားတွင် မိုးထစ်ချုန်းရွာမည်
၂၀၂၆ ခုနှစ်၊ နိုဝင်ဘာ ၂ ရက် နံနက်ပိုင်း တိုင်းထွာချက်များအရ ဘင်္ဂလားပင်လယ်အော်အနောက်အလယ်ပိုင်းတွင် ဖြစ်ပေါ်နေသော ဆိုင်ကလုန်းမုန်တိုင်း “မူရားစု” (MURASU) သည် အားကောင်းလာပြီး အားကောင်းသောဆိုင်ကလုန်းမုန်တိုင်းအဖြစ်သို့ ရောက်ရှိလာကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။
အဆိုပါမုန်တိုင်းသည် မြန်မာနိုင်ငံ ကိုကိုးကျွန်း၏ အနောက်ဘက် ရေမိုင် ၆၃၅ မိုင်ခန့်အကွာတွင် ဗဟိုပြုနေပြီး ဗဟိုချက်လေဖိအား ၉၉၈ ဟက်တိုပါစကယ်နှင့် အမြင့်ဆုံးလေတိုက်နှုန်း တစ်နာရီလျှင် မိုင် ၆၀ ခန့်ရှိကြောင်း သိရသည်။ မုန်တိုင်းသည် အနောက်မြောက်ဘက်သို့ ဆက်လက်ရွေ့လျားကာ နိုဝင်ဘာ ၃ ရက်တွင် အိန္ဒိယနိုင်ငံ အင်ဒရာပရာဒေ့ရှ်တောင်ပိုင်းကမ်းခြေသို့ နယ်လိုရီနှင့် နာစာပါမြို့တို့အကြားမှ ဖြတ်ကျော်နိုင်သည်ဟု ခန့်မှန်းထားသည်။
မုန်တိုင်း၏ လက်ရှိရွေ့လျားမှုအရ မြန်မာနိုင်ငံဘက်သို့ ဦးတည်လာမည့် အခြေအနေမရှိသေးသဖြင့် အဝါရောင်အဆင့် သတ်မှတ်ထားသော်လည်း မုန်တိုင်းအရှိန်ကြောင့် နိုဝင်ဘာ ၃ ရက်အတွင်း နိုင်ငံတစ်ဝန်းရှိ တိုင်းဒေသကြီးနှင့် ပြည်နယ်အများအပြားတွင် မိုးထစ်ချုန်းရွာသွန်းနိုင်ကြောင်း အသိပေးထားသည်။
အထူးသဖြင့် စစ်ကိုင်းတိုင်းအထက်ပိုင်း၊ ကချင်ပြည်နယ်၊ ချင်းပြည်နယ်နှင့် ရှမ်းပြည်နယ်မြောက်ပိုင်းတို့တွင် နေရာကွက်ကျား၊ ကျန်ဒေသအများစုတွင် နေရာကျဲကျဲမှ နေရာစိပ်စိပ် မိုးရွာနိုင်ပြီး နေပြည်တော်၊ ရန်ကုန်၊ မန္တလေးနှင့် အခြားမြို့ကြီးများတွင်လည်း မိုးထစ်ချုန်းရွာနိုင်ကြောင်း သိရသည်။
ထို့ပြင် ကချင်ပြည်နယ်တွင် မိုးတိမ်တောင်များ ဖြစ်ထွန်းနေသဖြင့် မိုးသည်းထန်ခြင်း၊ လေပြင်းတိုက်ခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းတို့ ဖြစ်ပေါ်နိုင်ကြောင်း သတိပေးထားသည်။
မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင်လည်း မိုးသက်လေပြင်းများ ကျရောက်နိုင်ပြီး လေတိုက်နှုန်း တစ်နာရီလျှင် ၂၅ မိုင်မှ မိုင် ၃၀ အထိ ရှိနိုင်ကာ လှိုင်းအမြင့် ၇ ပေမှ ၉ ပေခန့်အထိ ရှိနိုင်ကြောင်း ထုတ်ပြန်ချက်တွင် ဖော်ပြထားသည်။
မိုးသည်းထန်စွာရွာသွန်းမှုကြောင့် ရုတ်တရက်ရေကြီးခြင်း၊ ရေလျှံခြင်းနှင့် မြေပြိုခြင်းများ ဖြစ်ပေါ်နိုင်သဖြင့် မြစ်ငယ်၊ ချောင်းငယ်များအနီးနှင့် ကုန်းမြင့်ဒေသများတွင် နေထိုင်သူများအနေဖြင့် ကြိုတင်သတိပြုကြရန်၊ ကမ်းနီးကမ်းဝေးငါးဖမ်းရေယာဉ်များနှင့် သင်္ဘောများအနေဖြင့်လည်း မိုးလေဝသအခြေအနေကို စောင့်ကြည့်၍ သတိထားသွားလာကြရန် မိုးလေဝသဌာနက သတိပေးထားသည်။
မိုးဇလ