ကလေးများ၏ စိတ်ကျန်းမာရေး ကောင်းမွန်စေရန် မိဘများ၏ စိတ်ကျန်းမာရေးကိုလည်း ဂရုစိုက်ရန်လို

အသက် ၁၈ နှစ်အောက် ကလေးများရှိသည့် မိဘအများစုသည် မိဘအုပ်ထိန်းမှုနှင့် ဆက်စပ်သော စိတ်ဖိစီးမှုများကို ကြုံတွေ့နေရကြောင်း နိုင်ငံလုံးဆိုင်ရာ စစ်တမ်းသစ်တစ်ရပ်က ဖော်ပြလိုက်သည်။

The Kids Mental Health Foundation အတွက် Ipsos သုတေသနအဖွဲ့က ကောက်ယူခဲ့သည့် စစ်တမ်းအရ မိဘများ၏ ၉၇ ရာခိုင်နှုန်းသည် လွန်ခဲ့သော တစ်လအတွင်း မိဘဖြစ်ခြင်းနှင့် ဆက်စပ်သော စိတ်ဖိစီးမှုကို ခံစားခဲ့ရကြောင်း သိရသည်။ ထို့အပြင် မိဘ ၃၀ ရာခိုင်နှုန်းခန့်က စိတ်ဖိစီးမှုကို မကြာခဏ ခံစားရကြောင်း ဖြေကြားခဲ့သည်။

ကျွမ်းကျင်သူများက မိဘများ၏ စိတ်ကျန်းမာရေးနှင့် ကလေးများ၏ စိတ်ပိုင်းဆိုင်ရာ ဖွံ့ဖြိုးတိုးတက်မှုသည် နီးကပ်စွာ ဆက်စပ်နေကြောင်း ထောက်ပြထားသည်။ မိဘများ၏ စိတ်ဖိစီးမှုများသည် ကလေးများအပေါ်လည်း သက်ရောက်မှုရှိနိုင်သဖြင့် မိသားစုအတွင်း စိတ်ကျန်းမာရေးကို အထူးဂရုပြုရန် လိုအပ်ကြောင်း အကြံပြုထားသည်။

ကလေးများ စိတ်ဖိစီးမှု ကြုံတွေ့နေပါက မိဘများနှင့် အုပ်ထိန်းသူများအနေဖြင့် ကလေး၏ ခံစားချက်များကို မဝေဖန်ဘဲ စိတ်ရှည်စွာ နားထောင်ပေးသင့်ကြောင်း ကျန်းမာရေးပညာရှင်များက တိုက်တွန်းထားသည်။ ထို့ပြင် အိပ်ချိန်၊ စားချိန်နှင့် စာလုပ်ချိန်များကို ပုံမှန်စနစ်တကျ သတ်မှတ်ထားပေးခြင်းသည် ကလေးများအတွက် လုံခြုံမှုနှင့် တည်ငြိမ်မှုကို ဖြစ်ပေါ်စေသည်ဟု ဆိုသည်။

ကစားချိန်နှင့် ကိုယ်လက်လှုပ်ရှားမှုများအတွက် အချိန်ပေးခြင်းသည်လည်း စိတ်ဖိစီးမှု လျော့ကျစေပြီး စိတ်ခံစားချက်ကို ကောင်းမွန်စေကြောင်း သိရသည်။ ထို့အပြင် မိဘများ၏ အားပေးစကားများ၊ ချစ်ခင်ဂရုစိုက်မှုများနှင့် လုံခြုံနွေးထွေးသည့် မိသားစုပတ်ဝန်းကျင်သည် ကလေးများ၏ စိတ်ကျန်းမာရေးကို အထောက်အကူပြုကြောင်း ကျွမ်းကျင်သူများက ဆိုသည်။

ယနေ့ခေတ်တွင် ကလေးများ၏ မျက်နှာပြင်အသုံးပြုချိန် မြင့်တက်လာနေသဖြင့် အထူးသဖြင့် အိပ်ချိန်မတိုင်မီ ဖုန်း၊ တက်ဘလက်နှင့် အခြား အီလက်ထရွန်နစ်ပစ္စည်းများကို အလွန်အကျွံ အသုံးမပြုစေရန် မိဘများက မျှတစွာ စီမံပေးသင့်ကြောင်းလည်း အကြံပြုထားသည်။

#ကျန်းမာရေး #စိတ် #ကလေး #သုတမြေ #သုတ #သတင်းထူးသတင်းဦး

See less