ရေပတ်ခံယာဉ် ဘီးကျွတ်တိမ်းမှောက်မှုဖြစ်ပွား၊ ကိုယ်ဝန်ဆောင်နှင့် ကလေးငယ်အပါအဝင် ၇ ဦး ဒဏ်ရာရရှိ
ရန်ကုန်တိုင်းဒေသကြီး၊ ဒဂုံမြို့သစ်မြောက်ပိုင်းမြို့နယ်၊ တောင်မြောက်လမ်းဆုံအနီးတွင် ယနေ့ ဧပြီ ၁၄ ရက် သင်္ကြန်အကျနေ့ နံနက်ပိုင်းက ခရီးသည် ၁၃ ဦး လိုက်ပါလာသည့် ရေပတ်ခံမော်တော်ယာဉ်တစ်စီး ဘီးကျွတ်၍ အလယ်ကျွန်းတုံးအား တိုက်မိကာ တိမ်းမှောက်မှုတစ်ခု ဖြစ်ပွားခဲ့ကြောင်း သိရှိရသည်။
အဆိုပါ ဖြစ်စဉ်သည် ယနေ့နံနက် ၉ နာရီကျော် အချိန်ခန့်တွင် ဖြစ်ပွားခဲ့ခြင်းဖြစ်ပြီး၊ သင်္ကြန်ရေပတ်ခံထွက်လာသည့် အဆိုပါယာဉ်မှာ မောင်းနှင်နေစဉ်အတွင်း ယာဉ်၏ဘီးမှာ ရုတ်တရက် ကျွတ်ထွက်သွားခဲ့ခြင်း ဖြစ်သည်။ ထိုသို့ ဘီးကျွတ်သွားပြီးနောက် ယာဉ်မှာ ထိန်းချုပ်မှုကင်းမဲ့ကာ လမ်းမအလယ်ရှိ အလယ်တုံးနှင့် တိုက်မိပြီး လမ်းဘေးသို့ တိမ်းမှောက်သွားခဲ့ခြင်းဖြစ်ကြောင်း အခင်းဖြစ်ပွားရာသို့ ရောက်ရှိလာသည့် ဒေသခံများနှင့် ကူညီကယ်ဆယ်ရေးအဖွဲ့များထံမှ သိရသည်။
ယာဉ်ပေါ်တွင် စုစုပေါင်း လူဦးရေ ၁၃ ဦး လိုက်ပါလာခဲ့ရာ ယင်းတိမ်းမှောက်မှုကြောင့် အမျိုးသား၊ အမျိုးသမီး စုစုပေါင်း ၇ ဦး ဒဏ်ရာရရှိခဲ့သည်။ ဒဏ်ရာရရှိသူများထဲတွင် ကိုယ်ဝန်ဆောင် အမျိုးသမီးတစ်ဦးနှင့် ကလေးငယ်တစ်ဦးတို့ ပါဝင်နေသဖြင့် အခြေအနေမှာ စိုးရိမ်ရသည့်အတွက် အရေးပေါ် ကူညီကယ်ဆယ်ရေးများ ဆောင်ရွက်ခဲ့ရသည်။
အခင်းဖြစ်ပွားရာနေရာသို့ မြို့ဦးလုလင် နာရေးကူညီမှုအသင်းမှ လူနာတင်ယာဉ် ၂ စီးနှင့် ၂၈ ရပ်ကွက် လူမှုကူညီရေးအသင်းတို့မှ အဖွဲ့ဝင်များ ချက်ချင်းရောက်ရှိလာပြီး၊ ဒဏ်ရာရရှိသူများအား လိုအပ်သည့် ရှေးဦးသူနာပြုစုမှုများ ပြုလုပ်ပေးခဲ့ကြသည်။ ထို့နောက် ဒဏ်ရာရရှိသူ ၇ ဦးစလုံးအား မြောက်ဥက္ကလာပမြို့နယ်ရှိ မေဓါဝီဆေးရုံကြီးသို့ အရေးပေါ် ပို့ဆောင်ပေးခဲ့ကြကြောင်း သိရသည်။
လက်ရှိတွင် သက်ဆိုင်ရာ ရဲတပ်ဖွဲ့ဝင်များနှင့် တာဝန်ရှိသူများက ယာဉ်တိမ်းမှောက်မှု ဖြစ်စဉ်နှင့် ပတ်သက်၍ အသေးစိတ် စစ်ဆေးမှုများ ပြုလုပ်လျက်ရှိပြီး၊ ဒဏ်ရာရရှိသူများအား ဆေးရုံတွင် လိုအပ်သည့် ဆေးကုသမှုများ ဆက်လက်ပေးဆောင်လျက်ရှိကြောင်း သတင်းရရှိသည်။
သတင်းနှင့်ပုံ - မြို့ဦးလုလင်နာရေးကူညီမှုအသင်း
