ဒဏ်ရာရသူများကို ကူညီခဲ့သူ သူနာပြု ပစ်ကပ်ကားတိုက်ခံရ၍ သေဆုံး
ထိုင်းနိုင်ငံ ချင်းမိုင်မြို့တွင် လူငယ်အုပ်စုနှစ်စု ရန်ဖြစ်မှုကြောင့် ဒဏ်ရာရသူများကို ကူညီပေးရန် ရပ်တန့်ခဲ့သည့် သူနာပြုအကူ အမျိုးသမီးတစ်ဦး ပစ်ကပ်ကားတိုက်ခံရကာ သေဆုံးခဲ့ကြောင်း သိရသည်။
သေဆုံးသူမှာ ချင်းမိုင်တက္ကသိုလ် ဆေးရုံကြီးတွင် တာဝန်ထမ်းဆောင်နေသည့် Kanokrat Yottiwong ဖြစ်ပြီး နိုဝင်ဘာ ၁ ရက်တွင် ချင်းမိုင်တက္ကသိုလ် ဆေးပညာဌာနက ၎င်း၏သေဆုံးမှုအတွက် ဝမ်းနည်းကြောင်း ထုတ်ပြန်ခဲ့သည်။
ဖြစ်စဉ်မှာ နိုဝင်ဘာ ၁ ရက် နံနက် ၁၂ နာရီ ၅ မိနစ်ခန့်က ချင်းမိုင်မြို့ Don Chan တံတားအနီး စူပါဟိုင်းဝေးလမ်းမပေါ်တွင် ဖြစ်ပွားခဲ့ခြင်းဖြစ်သည်။ လူမှုကွန်ရက်ပေါ်မှ အငြင်းပွားမှုကြောင့် လူငယ်အုပ်စုနှစ်စု ချိန်းဆိုရန်ဖြစ်ခဲ့ကြပြီး ရဲတပ်ဖွဲ့ရောက်ရှိလာချိန်တွင် လူစုခွဲခဲ့သော်လည်း နောက်ပိုင်း၌ လမ်းမပေါ်တွင် အပြန်အလှန် လိုက်လံခဲ့ကြကြောင်း သိရသည်။
ထိုစဉ် ဆိုင်ကယ်တစ်စီး တိမ်းမှောက်မှုဖြစ်ပွားခဲ့ရာ အနီးမှဖြတ်သန်းလာသည့် Kanokrat က ဒဏ်ရာရသူများကို ဆေးကုသကူညီပေးရန် ရပ်တန့်ခဲ့ခြင်းဖြစ်သည်။ ထိုအချိန်တွင် လူငယ်အုပ်စုတစ်စုနှင့် ဆက်စပ်နေသည့် ပစ်ကပ်ကားက ဝင်တိုက်ခဲ့သဖြင့် အခင်းဖြစ်နေရာ၌ပင် သေဆုံးခဲ့သည်။
ပစ်ကပ်ကားမောင်းသူက ပြိုင်ဘက်အုပ်စု၏ သေနတ်ပစ်ခတ်မှုကို ရှောင်ရှားရန် ခေါင်းငုံ့မောင်းနှင်ခဲ့ရာ လမ်းကို သေချာမမြင်ဘဲ တိုက်မိခဲ့ကြောင်း ထွက်ဆိုထားသည်။ သို့သော် ရဲတပ်ဖွဲ့က ၎င်း၏ထွက်ဆိုချက်ကို သံသယရှိနေပြီး အရှိန်ပြင်းစွာ မောင်းနှင်ခဲ့ခြင်းကြောင့် ဖြစ်နိုင်ကြောင်း စစ်ဆေးနေသည်။
ယာဉ်မောင်းသည် နိုဝင်ဘာ ၁ ရက် နံနက်ပိုင်းတွင် ပစ်ကပ်ကားနှင့်အတူ ရဲစခန်းသို့ လာရောက်အဖမ်းခံခဲ့ပြီး ရဲတပ်ဖွဲ့က CCTV မှတ်တမ်းများကို စစ်ဆေးကာ ဖြစ်စဉ်တွင် ပါဝင်ပတ်သက်သူများကို ဖော်ထုတ်နေကြောင်း သိရသည်။
Khaosod News