အပူချိန်မြင့်တက်မှုနှင့် ဓာတ်အားလိုအပ်ချက်ကြောင့် အောက်တိုဘာ ၅ ရက်မှ အလှည့်ကျဓာတ်အားပေးမည်
အပူချိန်မြင့်တက်လာမှုနှင့် ဓာတ်အားလိုအပ်ချက် မြင့်မားလာခြင်းတို့ကြောင့် လျှပ်စစ်ဓာတ်အားထုတ်လုပ်နိုင်မှုနှင့် သုံးစွဲမှုကို မျှတစေရန် အောက်တိုဘာ ၅ ရက်မှစတင်၍ အလှည့်ကျစနစ်ဖြင့် ဓာတ်အားဖြန့်ဖြူးသွားမည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက အသိပေးထားသည်။
မုတ်သုန်လေဆုတ်ခွာပြီး မိုးရာသီကုန်ဆုံးကာ ပွင့်လင်းရာသီသို့ ဝင်ရောက်လာခြင်းနှင့် ပြင်းထန်သည့် အယ်လ်နီညိုရာသီဥတုဖြစ်စဉ်၏ သက်ရောက်မှုများကြောင့် နိုင်ငံတစ်ဝန်း အပူချိန်များ မြင့်တက်လာနေပြီး လျှပ်စစ်ဓာတ်အားသုံးစွဲမှုလည်း တိုးလာနေသည်ဟု ဝန်ကြီးဌာနက ဆိုသည်။
လက်ရှိအခြေအနေတွင် ဓာတ်အားထုတ်လုပ်နိုင်မှုနှင့် သုံးစွဲမှုအကြား ဟန်ချက်ညီစေရန် ဝန်အားထိန်းညှိခြင်းကို မဖြစ်မနေ ဆောင်ရွက်ရမည်ဖြစ်ပြီး လျှပ်စစ်ဓာတ်အားပြတ်တောက်မှု ပိုမိုမဖြစ်ပေါ်စေရေးအတွက် အနည်းဆုံးပမာဏဖြင့် အလှည့်ကျဖြန့်ဖြူးသွားမည်ဖြစ်ကြောင်း သိရသည်။
ထို့အပြင် ယခုနှစ်နွေရာသီတွင် ရေအားလျှပ်စစ်စက်ရုံများ၏ ရေလှောင်တမံများ၌ ရေခန်းခြောက်မှု ဖြစ်ပေါ်နိုင်ခြေရှိသဖြင့် လာမည့် ၂၀၂၇ ခုနှစ် မိုးရာသီအထိ ရေသိုလှောင်မှုပမာဏကို ထိန်းညှိကာ ဓာတ်အားထုတ်လုပ်နိုင်ရန် စီမံထားကြောင်းလည်း ဝန်ကြီးဌာနက ထုတ်ပြန်ထားသည်။
ဓာတ်အားထုတ်လုပ်နိုင်မှု တိုးမြှင့်နိုင်ရန်အတွက် ဆိုလာစီမံကိန်းများနှင့် ရေအားလျှပ်စစ်စီမံကိန်းအသစ်များကို အကောင်အထည်ဖော်နေသကဲ့သို့ ပျက်စီးခဲ့သည့် ဓာတ်အားပေးစနစ်များ ပြန်လည်ကောင်းမွန်ရေးကိုလည်း ဆောင်ရွက်နေကြောင်း သိရသည်။
ဝန်ကြီးဌာန၏ ထုတ်ပြန်ချက်အရ ဓာတ်အားထုတ်လုပ်မှုနှင့် သုံးစွဲမှု မမျှတပါက ဓာတ်အားထုတ်စက်များ ရုတ်တရက်ရပ်တန့်ခြင်း၊ မဟာဓာတ်အားလိုင်းများ ချို့ယွင်းခြင်းနှင့် တစ်နိုင်ငံလုံးအတိုင်းအတာဖြင့် ဓာတ်အားစနစ်ပြတ်တောက်သည့် System Breakdown ဖြစ်ပေါ်နိုင်သဖြင့် ယခုကဲ့သို့ အလှည့်ကျစနစ်ဖြင့် ဓာတ်အားဖြန့်ဖြူးခြင်းဖြစ်ကြောင်း သိရသည်။