ကမ္ဘာ့အကောင်းဆုံးဆန်ဆုကို မြန်မာ့ပေါ်ဆန်းက ၁၅ နှစ်အကြာ ဒုတိယအကြိမ် ရရှိ

မြန်မာ့ပေါ်ဆန်းဆန်သည် ဖိလစ်ပိုင်နိုင်ငံ၊ မနီလာမြို့တွင် ကျင်းပသည့် International World Rice Conference 2026 ၏ ဆန်အရည်အသွေးယှဉ်ပြိုင်ပွဲတွင် ကမ္ဘာ့အကောင်းဆုံးဆန်ဆု (World’s Best Rice Award 2026) ကို ထပ်မံဆွတ်ခူးရရှိခဲ့ကြောင်း သိရသည်။

အမေရိကန်အခြေစိုက် International Commodity Institute နှင့် The Rice Trader တို့က ဦးဆောင်ကျင်းပသည့် အဆိုပါညီလာခံကို အောက်တိုဘာ ၇ ရက်မှ ၁၀ ရက်အထိ ကျင်းပခဲ့ပြီး နိုင်ငံတကာမှ ဆန်အမျိုးအစားများ ပါဝင်ယှဉ်ပြိုင်ခဲ့ကြသည်။

မြန်မာ့ပေါ်ဆန်းဆန်သည် ၂၀၁၁ ခုနှစ်က ဗီယက်နမ်နိုင်ငံ၊ ဟိုချီမင်းမြို့တွင် ကျင်းပခဲ့သည့် နိုင်ငံတကာဆန်စပါးညီလာခံ၌လည်း ကမ္ဘာ့အကောင်းဆုံးဆန်ဆုကို ရရှိခဲ့ဖူးသဖြင့် ယခုတစ်ကြိမ်မှာ ၁၅ နှစ်အကြာ ဒုတိယအကြိမ်မြောက် ဆွတ်ခူးနိုင်ခဲ့ခြင်းဖြစ်သည်။

ညီလာခံသို့ မြန်မာနိုင်ငံမှ အစိုးရ-ပုဂ္ဂလိက ကိုယ်စားလှယ်များနှင့် ဆန်တင်ပို့သည့် ကုမ္ပဏီများအပါအဝင် ကိုယ်စားလှယ် ၅၅ ဦး တက်ရောက်ခဲ့ပြီး မြန်မာနိုင်ငံဆန်စပါးအသင်းချုပ်ဥက္ကဋ္ဌ ဦးရဲမင်းအောင်က “Myanmar Rice Outlook 2026” ခေါင်းစဉ်ဖြင့် ဆွေးနွေးခဲ့သလို မြန်မာ့ဆန်ပြခန်းကိုလည်း ခင်းကျင်းပြသခဲ့သည်။

ထို့အပြင် ဖိလစ်ပိုင်၊ မလေးရှားနှင့် အာဖရိကနိုင်ငံများသို့ ဆန်တင်ပို့မှု တိုးမြှင့်ရေးနှင့် အရောင်းအဝယ်စာချုပ်များ ချုပ်ဆိုနိုင်ရေးတို့ကို ဆွေးနွေးခဲ့ကြသည်။ မြန်မာနိုင်ငံဆန်စပါးအသင်းချုပ်အနေဖြင့်လည်း ၂၀၂၆-၂၀၂၇ ဘဏ္ဍာနှစ်အတွင်း ဆန်တန်ချိန် ၃ သန်း တင်ပို့နိုင်ရန် ရည်မှန်းထားကြောင်း သိရသည်။

#သုတမြေ #ဆန် #ပေါ်ဆန်းမွှေး #ဆု #သတင်း #ပြည်တွင်း