မြန်မာအမျိုးသားလေကြောင်းလိုင်း (MNA) လေယာဉ် ဘရိတ်စနစ်ချို့ယွင်းမှုကြောင့် MAI လေယာဉ်အား တိုက်မိ
ရန်ကုန်အပြည်ပြည်ဆိုင်ရာလေဆိပ်၌ ယမန်နေ့ ဧပြီလ ၂၀ ရက်၊ နံနက်ပိုင်းအချိန်က မြန်မာအမျိုးသားလေကြောင်းလိုင်း (MNA) ၏ ATR-72 လေယာဉ်တစ်စင်း ပြေးလမ်းပေါ်တွင် ရွေ့လျားနေစဉ် ဘရိတ်စနစ် ချို့ယွင်းမှုဖြစ်ပွားပြီး ရပ်နားထားသည့် အပြည်ပြည်ဆိုင်ရာမြန်မာ့လေကြောင်း (MAI) ၏ Airbus A319 လေယာဉ်အား တိုက်မိသည့်ဖြစ်စဉ်တစ်ခု ဖြစ်ပွားခဲ့ကြောင်း သိရှိရသည်။
ဖြစ်စဉ်မှာ အဆိုပါ MNA လေယာဉ်သည် လေဆိပ်ပြေးလမ်းပေါ်တွင် ထွက်ခွာရန် ပြင်ဆင်နေချိန်၌ ဘရိတ်စနစ် အလုပ်မလုပ်တော့ဘဲ ထိန်းချုပ်မှု လွဲချော်သွားခဲ့ခြင်း ဖြစ်သည်။ ထိုသို့ အရှိန်မထိန်းနိုင်ဖြစ်ရာမှ ရပ်နားထားသည့် MAI ၏ Airbus A319 လေယာဉ်၏ အမြီးပိုင်းကို တိုက်မိခဲ့ပြီး၊ ဆက်လက်၍ လေယာဉ်လမ်းကြောင်း ပြောင်းသွားကာ လေဆိပ်အတွင်း အသုံးပြုသည့် ကုန်တင်လှည်းတစ်စီးကို ထပ်မံတိုက်မိပြီးနောက်တွင်မှ ရပ်တန့်သွားခဲ့ခြင်းဖြစ်သည်။
အဆိုပါ လေယာဉ်ချင်း တိုက်မိမှုနှင့် ပတ်သက်၍ လေကြောင်းလိုင်းတာဝန်ရှိသူများနှင့် လေဆိပ်အာဏာပိုင်များ၏ ကနဦးစစ်ဆေးချက်များအရ လေယာဉ်နှစ်စင်းစလုံးတွင် အနည်းငယ် ထိခိုက်မှုများရှိသော်လည်း ကြီးမားသည့် ပျက်စီးဆုံးရှုံးမှုမျိုး မရှိကြောင်း သိရသည်။ ထို့အပြင် ဖြစ်စဉ်ဖြစ်ပွားချိန်တွင် လေယာဉ်ပေါ်၌ လိုက်ပါလာသည့် ခရီးသည်များနှင့် လေဆိပ်ဝန်ထမ်းများအားလုံး ဘေးအန္တရာယ်ကင်းရှင်းပြီး ထိခိုက်ဒဏ်ရာရရှိသူ တစ်ဦးမျှ မရှိကြောင်း အတည်ပြုချက်များ ထွက်ပေါ်လာသည်။
လက်ရှိအချိန်တွင် လေဆိပ်အာဏာပိုင်များနှင့် သက်ဆိုင်ရာ ကျွမ်းကျင်ပညာရှင်များက ဘရိတ်စနစ် ချို့ယွင်းခဲ့ရသည့် အကြောင်းရင်းအတိအကျကို သိရှိနိုင်ရန်အတွက် နည်းပညာပိုင်းဆိုင်ရာ စစ်ဆေးမှုများကို အသေးစိတ် ဆက်လက်ဆောင်ရွက်လျက်ရှိသည်။ ဤဖြစ်စဉ်ကြောင့် လေယာဉ်များ၏ ပျက်စီးဆုံးရှုံးမှုတန်ဖိုးကိုမူ ထုတ်ပြန်ထားခြင်း မရှိသေးပေ။