မင်းသမီးဒိုင်ယာနာ၏ နာမည်ကျော် “Revenge Dress” လေလံတင်ရောင်းချမည်
ဗြိတိန်မင်းသမီး ဒိုင်ယာနာ ဝတ်ဆင်ခဲ့ပြီး “Revenge Dress” ဟု နာမည်ကျော်ခဲ့သည့် အနက်ရောင်ပိုးသားညနေခင်းဝတ်စုံကို ဒီဇင်ဘာ ၉ ရက်တွင် လေလံတင်ရောင်းချမည်ဖြစ်ပြီး တန်ဖိုး ပေါင် ၂၂၀,၀၀၀ (အမေရိကန်ဒေါ်လာ ၃ သိန်းခန့်) အထိ ရရှိနိုင်ကြောင်း လေလံအဖွဲ့ Sotheby’s က ခန့်မှန်းထားသည်။
မင်းသမီးဒိုင်ယာနာသည် ထိုဝတ်စုံကို ၁၉၉၄ ခုနှစ်တွင် လန်ဒန်မြို့ Serpentine Gallery ၌ ကျင်းပသည့် ပွဲတစ်ခုသို့ တက်ရောက်ရာတွင် ဝတ်ဆင်ခဲ့ခြင်းဖြစ်သည်။ ထိုနေ့တွင်ပင် ၎င်း၏ခင်ပွန်းဖြစ်သူ မင်းသားချားလ်စ်က အိမ်ထောင်ရေးအတွင်း ဖောက်ပြန်ခဲ့ကြောင်း ရုပ်မြင်သံကြားမှတ်တမ်းအစီအစဉ်တစ်ခုတွင် ဝန်ခံခဲ့ပြီးနောက် နာရီပိုင်းအကြာ၌ ဒိုင်ယာနာက အဆိုပါဝတ်စုံဖြင့် လူအများရှေ့သို့ ထင်ရှားစွာ ထွက်ပေါ်လာခဲ့ခြင်းဖြစ်သည်။
ပခုံးလွတ် အနက်ရောင်ဝတ်စုံဖြင့် ဒိုင်ယာနာ၏ ထိုညက ရောက်ရှိလာမှုသည် ခေတ်ပြိုင်ယဉ်ကျေးမှုသမိုင်းတွင် အမှတ်ရဖွယ်ဖြစ်ရပ်တစ်ခု ဖြစ်လာခဲ့ပြီး “Revenge Dress” ဟု လူသိများလာခဲ့သည်။
Sotheby’s ၏ အဆိုအရ ယခုလေလံသည် ၁၉၉၇ ခုနှစ်နောက်ပိုင်း အဆိုပါဝတ်စုံကို ပထမဆုံးအကြိမ် ပြန်လည်လေလံတင်ခြင်းဖြစ်သည်။ ဒိုင်ယာနာသည် မသေဆုံးမီ လအနည်းငယ်အလို ၁၉၉၇ ခုနှစ်တွင် ၎င်းဝတ်ဆင်ခဲ့သည့် ဝတ်စုံ ၇၉ ထည်ကို လေလံတင်ရောင်းချခဲ့ပြီး ရရှိငွေများကို ပရဟိတလုပ်ငန်းများအတွက် လှူဒါန်းခဲ့သည်။
Sotheby’s က ဖက်ရှင်သည် မိမိကိုယ်တိုင် ပြောဆိုလိုသည့် သတင်းစကားတစ်ရပ်အဖြစ် အသုံးချနိုင်ကြောင်း ဒိုင်ယာနာက နားလည်သဘောပေါက်ခဲ့ပြီး ထိုဝတ်စုံမှတစ်ဆင့် မိမိ၏ဘဝအပေါ် အများက ရေးသားဖော်ပြနေသည့် ဇာတ်ကြောင်းကို ကိုယ်တိုင်ပြန်လည်ထိန်းချုပ်နိုင်ခဲ့သည်ဟု ဆိုသည်။
BBC news