System Breakdown ဖြစ်ပွားကာ နိုင်ငံတစ်ဝန်း လျှပ်စစ်မီးပြတ်တောက်ခဲ့
မြန်မာနိုင်ငံတစ်ဝန်းတွင် ယနေ့ စက်တင်ဘာ ၁၁ ရက် နံနက်ပိုင်းမှစတင်ကာ ဓာတ်အားပေးစနစ် ချို့ယွင်းမှု (System Breakdown) နှစ်ကြိမ် ဖြစ်ပွားခဲ့ပြီး ရန်ကုန်အပါအဝင် တိုင်းဒေသကြီးနှင့် ပြည်နယ်အချို့တွင် လျှပ်စစ်မီး အချိန်ကြာမြင့်စွာ ပြတ်တောက်ခဲ့ကြောင်း ဒေသခံများထံမှ သိရပါတယ်။
ပထမအကြိမ် System Breakdown မှာ နံနက် ၆ နာရီခွဲခန့်တွင် ဖြစ်ပွားခဲ့ပြီး ၂၃၀ ကေဗွီ သပြေဝ–တောင်တွင်းကြီး ဓာတ်အားလိုင်းတွင် အပြစ်ဖြစ်ပေါ်ခဲ့ခြင်းကြောင့် တစ်နိုင်ငံလုံး ဓာတ်အားပြတ်တောက်မှု ဖြစ်ပေါ်ခဲ့ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က အသိပေးထားပါတယ်။
ဓာတ်အားပြန်လည်ရရှိရန် ပြုပြင်ဆောင်ရွက်မှုမှာ ၂ နာရီဝန်းကျင် ကြာမြင့်နိုင်ကြောင်း YESC က ထုတ်ပြန်ထားသော်လည်း ရန်ကုန်မြို့ရှိ နေရာအချို့တွင်သာ မီးပြန်လည်ရရှိခဲ့ပြီး ဒေသအများအပြားမှာ မီးပြတ်တောက်မှု ဆက်လက်ဖြစ်ပေါ်နေခဲ့ပါတယ်။
မြောက်ဒဂုံမြို့နယ် ဒေသခံတစ်ဦး၏ ပြောကြားချက်အရ မနက် ၆ နာရီဝန်းကျင်ကတည်းက မီးပြတ်တောက်ခဲ့ပြီး ၁၀ နာရီခွဲခန့်တွင် မီးပြန်လာခဲ့သော်လည်း နေ့လယ် ၁ နာရီဝန်းကျင်တွင် ထပ်မံပြတ်တောက်ခဲ့ပါတယ်။
ရွှေဘိုမြို့နယ်တွင်လည်း နံနက် ၆ နာရီ ၃၆ မိနစ်တွင် ပထမအကြိမ် System Breakdown ဖြစ်ပွားခဲ့ပြီး ၁၀ နာရီ ၄၅ မိနစ်တွင် မီးပြန်လည်ရရှိခဲ့ကာ မွန်းလွဲ ၁ နာရီ ၂၆ မိနစ်တွင် System Breakdown ထပ်မံဖြစ်ပွားခဲ့ကြောင်း ဒေသခံများထံ အသိပေးချက်အရ သိရပါတယ်။
ရန်ကုန်မြို့ မြောက်ဥက္ကလာပမြို့နယ်မှ ဒေသခံအချို့ကတော့ မနက် ၆ နာရီဝန်းကျင်ကတည်းက မီးပြတ်တောက်ခဲ့ပြီး ညနေပိုင်းအထိ ပြန်လည်ရရှိခြင်းမရှိသေးကြောင်း ပြောပါတယ်။ သန်လျင်မြို့နယ်တွင်လည်း မနက်ပိုင်းက မီးပြန်လာပြီးနောက် ၁၀ နာရီ ၄ မိနစ်ခန့်တွင် ထပ်မံပြတ်တောက်ခဲ့ကြောင်း ဒေသခံတစ်ဦးက ပြောပါတယ်။
အခြားဒေသများတွင်မူ မန္တလေးတိုင်း၊ ပြင်ဦးလွင်မြို့၌ နေ့လယ် ၂ နာရီဝန်းကျင်တွင် မီးပြန်လည်ရရှိခဲ့ကြောင်း ဒေသခံတစ်ဦးက ပြောပါတယ်။
တစ်နိုင်ငံလုံးအတိုင်းအတာဖြင့် မီးပြတ်တောက်မှုကြောင့် နေ့စဉ်လုပ်ငန်းဆောင်တာများနှင့် အများပြည်သူ၏ လူနေမှုဘဝများအပေါ် အခက်အခဲများ ဖြစ်ပေါ်နေပြီး လျှပ်စစ်ဓာတ်အား ပြန်လည်ဖြန့်ဖြူးနိုင်ရေးအတွက် သက်ဆိုင်ရာဝန်ထမ်းများက ပြုပြင်ဆောင်ရွက်နေကြောင်း သိရပါတယ်။