T.O.P ၏ Jakarta Fan Meeting ဖျက်သိမ်း
စက်တင်ဘာ ၁၀ ရက်နေ့တွင် TONZ Entertainment က T.O.P ၏ “T.O.P PRE-STUDIO 2026” Jakarta Fan Meeting ကို “ဒေသတွင်းအခြေအနေများကြောင့်” ဖျက်သိမ်းလိုက်ကြောင်း ကြေညာခဲ့သည်။ အဆိုပါပွဲကို မူလက စက်တင်ဘာ ၁၉ ရက်နေ့တွင် ကျင်းပရန် စီစဉ်ထားခဲ့ခြင်းဖြစ်သည်။
T.O.P ၏ အေဂျင်စီက ပွဲမကျင်းပမီ ၉ ရက်ခန့်အလိုတွင် ဖျက်သိမ်းကြောင်း ကြေညာခဲ့ခြင်းဖြစ်ပြီး၊ ပွဲကို ဆက်လက်ကျင်းပနိုင်ရန် အစွမ်းကုန် ကြိုးစားခဲ့သော်လည်း ဒေသတွင်းအခြေအနေများကြောင့် မူလစီစဉ်ထားသည့်အတိုင်း ကျင်းပနိုင်တော့မည်မဟုတ်ကြောင်း ဆုံးဖြတ်ခဲ့သည်ဟု ဆိုသည်။
သို့သော် “ဒေသတွင်းအခြေအနေ” ဟူသည့် အကြောင်းပြချက်အပြင် တိကျသောအကြောင်းရင်းကို အေဂျင်စီဘက်က ထုတ်ဖော်ပြောကြားခြင်း မရှိသလို၊ ထပ်မံရှင်းလင်းချက်လည်း မပေးခဲ့ပါ။
Jakarta ခရီးစဉ်သည် T.O.P ၏ အာရှ Fan Meeting Tour အစီအစဉ်ထဲမှ တစ်ခုဖြစ်သည်။ အဆိုပါ Tour ကို သြဂုတ်လတွင် Hong Kong မှ စတင်ခဲ့ပြီး Taipei၊ Kuala Lumpur၊ Tokyo နှင့် Kaohsiung စသည့် မြို့များသို့ ဆက်လက်သွားရောက်ရန် စီစဉ်ထားခဲ့သည်။ လက်ရှိဖျက်သိမ်းကြောင်း ကြေညာချက်တွင်မူ Jakarta ပွဲနှင့်ပတ်သက်၍သာ ဖော်ပြထားသည်။
ဒေသတွင်းမီဒီယာများက စက်တင်ဘာလအစောပိုင်းတွင် Jakarta ၏ အနောက်ဘက် ၁၅၀ ကီလိုမီတာခန့်အကွာရှိ Anak Krakatau မီးတောင် ပေါက်ကွဲမှု အပါအဝင် ဖြစ်နိုင်ချေရှိသည့် အကြောင်းရင်းအချို့ကို ဖော်ပြခဲ့ကြသည်။ သို့သော် ထိုအကြောင်းရင်းများထဲမှ မည်သည့်အရာသည် ပွဲဖျက်သိမ်းရခြင်း၏ တိကျသောအကြောင်းရင်းဖြစ်ကြောင်း အေဂျင်စီက အတည်ပြုထားခြင်း မရှိသေးပါ။
ယခု Asia Fan Meeting Tour သည် နှစ်ပေါင်း ၂၀ ခန့်ကြာမြင့်သည့် အနုပညာသက်တမ်းအတွင်း T.O.P အတွက် အကြီးစားအာရှ Fan Meeting Tour တစ်ခုအဖြစ် ပထမဆုံးပြုလုပ်ခြင်းလည်း ဖြစ်သည်။
Tour ကို ဩဂုတ် ၁၅ ရက်နေ့တွင် Hong Kong မှ စတင်ခဲ့ပြီး ဒီဇင်ဘာလအထိ ဆက်လက်ကျင်းပရန် မူလက စီစဉ်ထားခဲ့သည်။